Sagar Zuku tailerra

26/08/2024

Egin zure sagar zukua eta izan zaitez sagardogile egun batez!

Egun pasa ederra familian egiteko!

Ez dago zure ahaleginaren ondorioz zuk zeuk egindako edari gozo bat dastatzea baino plazer handiagorik; kasu honetan, sagar-zuku naturalaz ari gara.

Sagardoa Routetik familiako txikienek ahaztuko ez duten jarduera bat proposatzen dizuegu. Plan ezin hobea da euskal sagardotegi batean zure egonaldia osatzeko eta familian edo lagunartean goiz berezi bat pasatzeko.

Esperientzia sagardotegiko sagastian hasiko da, non gidak sarrera txiki bat egingo duen aurkitzen garen sagastiari buruz eta muztioa egiteko bilduko ditugun euskal sagar barietateei buruz. Erabiliko ditugun sagardo sagarrak ezagutu ondoren, lanari ekingo diogu.

Saskia eta kixkia hartu eta ekin! Sagarrak, Euskal Herrian biltzen diren modu tradizionalean jasoko ditugu, kixkiaren laguntzaz. Gure saskiak frutaz betetakoan, elaborazio-gunera hurbilduko gara.

Elaborazio-eremuan, zukua egiteko hainbat tresna aurkituko ditugu. Hasi aurretik, gure gidak pisoien, matxakaren eta erabiliko dugun prentsa txikiaren erabilera azalduko digu. Eta honako hau ikasi ondoren, denok parte hartuko dugu sagar-zukua egiten.

Lehenengo urratsa sagarrak zatitzea izango da, eta horretarako egurrezko pisoi batzuk erabiliko ditugu, sagarrak jotzeko. Sagar guztiak birrintzen ditugunean, gure egurrezko palak hartu eta sagar zatiak gure eskuzko prentsa txikian sartuko ditugu, familia osoak erabil dezakeena.

Prentsa bete ondoren, biradera bira eta bira hasiko gara denon artean, eta honek presioa eragingo du sagarren gainean. Pixkanaka, gure urre likidoa prentsaren zirrikituetatik erortzen hasiko da haren azpian kokatu dugun pitxerrera.

Pitxerra zukuz beteta dagoenean, esperientziaren unerik bereziena iristen da: gure eskuekin egindako sagar zuku naturala dastatzea!

Muztioa dastatu ondoren, sagardotegiko txoko guztiak ezagutzeko aukera izango duzu, sagardotegiko menu tradizionalaz gozatzera eseri aurretik.

Sagardotegi menuaren barruan sartzen da; etxeko aperitiboa, bakailao tortila, bakailao frititua piper berdeekin, txuleta parrilan eta gazta, irasagarra eta intxaurrak. Umeentzako menuak aldiz, oilasko petxugak, xerra edo xolomoa patatekin eta helatua izaten da normalean. Hau guztia Euskal Sagardoa eta sagar zuku naturalarekin.